Qeveria e Talibanit në Afganistan ka urdhëruar heqjen e librave të shkruar nga gra nga programet universitare, duke i cilësuar ato si “kundër Sharias dhe politikave të sistemit”. Nga një listë prej 680 librash të ndaluar, rreth 140 janë të autorësisë femërore.

Përveç librave, autoritetet kanë ndaluar edhe mësimin e 18 lëndëve në universitete, përfshirë kurse mbi të drejtat e njeriut, ngacmimin seksual, sociologjinë e grave dhe zhvillimin gjinor. Zyrtarë të Ministrisë së Arsimit të Lartë kanë deklaruar se këto vendime janë marrë nga një panel “dijetarësh dhe ekspertësh fetarë”.

Kjo masë vjen si pjesë e kufizimeve të njëpasnjëshme ndaj grave dhe vajzave në Afganistan. Ato tashmë nuk mund të vijojnë shkollimin përtej klasës së gjashtë, ndërsa në vitin 2024 edhe kurset e mamisë u mbyllën. Profesionistë të arsimit në vend theksojnë se heqja e librave nga autorë iranianë dhe gra krijon një boshllëk të madh në arsimin universitar, duke e shkëputur vendin nga lidhjet me komunitetin akademik ndërkombëtar.

Vendimi ka ngjallur kritika të ashpra nga autorë dhe ish-zyrtarë afganë, të cilët thonë se kjo pasqyron qartë qëndrimin mizogjin të Talibanit dhe përpjekjet e tyre për të heshtur çdo zë femëror në fushën e dijes.