Procesi i vendosjes së vulës në pasaportë gjatë kalimit të kufijve pritet të bëhet së shpejti pjesë e së kaluarës. Bashkimi Evropian ka nisur zbatimin e sistemit të ri Entry/Exit System (EES), i cili do të regjistrojë hyrjet dhe daljet e shtetasve joanëtarë të BE-së përmes të dhënave biometrike dhe kontrolleve digjitale.

Sistemi pritet të zbatohet plotësisht deri në prill të vitit 2026 dhe do të zëvendësojë vendosjen manuale të vulave në pasaporta, duke e bërë procesin e kontrollit kufitar më të shpejtë dhe më të sigurt. Ky ndryshim është pjesë e një trendi global, pasi vende si Australia, Japonia dhe Kanadaja tashmë përdorin sisteme të ngjashme biometrike.

Ndërkohë që shumë udhëtarë e mirëpresin këtë zhvillim për shkak të kursimit të kohës, të tjerë shprehin nostalgji për vulat në pasaportë, të cilat për dekada kanë shërbyer si dëshmi fizike e udhëtimeve ndërkombëtare.