Dubai dhe Abu Dhabi po përballen me përmbytjet më të mëdha në 76 vitet e fundit, duke shkaktuar kaos në rrugë dhe ndërprerje të shumta të fluturimeve. Shërbimi meteorologjik i Emirateve të Bashkuara Arabe paralajmëroi qytetarët për kushte ekstreme të motit, duke u kërkuar të shmangin daljet jashtë përveç rasteve të domosdoshme.

Reshjet e dendura të shiut kanë detyruar autoritetet të mbyllin plazhet dhe parqet në Abu Dhabi, ndërsa pamjet nga terreni tregojnë automjete të bllokuara dhe rrugë të përmbytura.

Shumë fluturime janë anuluar, përfshirë ato të Emirates drejt Londrës dhe Frankfurtit, si edhe shërbimet e FlyDubai dhe IndiGo. Autoritetet paralajmërojnë se ndërprerjet në transportin ajror mund të vazhdojnë gjatë ditës.

Ministria e Brendshme u ka bërë thirrje qytetarëve të tregojnë kujdes maksimal dhe të shmangin lëvizjet e panevojshme, ndërsa moti i paqëndrueshëm pritet të vazhdojë edhe më tej.