Toka po përjeton nivelin më të lartë të çrregullimit klimatik në histori, sipas një raporti të fundit të World Meteorological Organization.

Sipas këtij institucioni, planeti po grumbullon më shumë energji nxehtësie sesa është në gjendje të lëshojë, për shkak të emetimeve të gazrave serrë si dioksidi i karbonit.

Ky “çekuilibër energjetik” ka çuar në rritje rekord të temperaturave të oqeaneve, shkrirje të akullnajave dhe nivele të larta të temperaturave globale. Në vitin 2025, temperatura mesatare globale ishte rreth 1.43°C mbi nivelet para-industriale.

Raporti thekson se 11 vitet e fundit kanë qenë më të nxehtat që nga fillimi i matjeve në vitin 1850, ndërsa mbi 90% e nxehtësisë së tepërt po absorbohet nga oqeanet.

Shkencëtarët paralajmërojnë se rikthimi i fenomenit El Niño mund të shtyjë temperaturat globale drejt rekordeve të reja në vitet e ardhshme.

Sekretari i Përgjithshëm i OKB-së, António Guterres, ka bërë thirrje për kalim urgjent nga lëndët djegëse fosile në energji të rinovueshme, duke theksuar se “çdo tregues klimatik po sinjalizon alarm”.

Raporti gjithashtu paralajmëron për pasoja të drejtpërdrejta, përfshirë rritjen e fenomeneve ekstreme të motit dhe ndikime në shëndet dhe ekonomi globale.