Për herë të parë në Britaninë e Madhe, numri i personave mbi 16 vjeç që përdorin vape ose cigare elektronike ka kaluar numrin e duhanpirësve tradicionalë, sipas Zyrës Kombëtare të Statistikave (ONS).

Të dhënat e vitit 2024 tregojnë se 5.4 milion të rritur përdorin vape çdo ditë ose rastësisht, krahasuar me 4.9 milion që pijnë duhan. Përdorimi i vape-ve është më i zakonshëm te grupmoshat 25–49 vjeç dhe në rritje te gratë.

Sipas Shërbimit Shëndetësor Britanik (NHS), vapingu mbart vetëm një pjesë të vogël të rreziqeve të duhanit, megjithëse efektet afatgjata ende nuk janë plotësisht të njohura.
Organizata “Action on Smoking and Health” e ka cilësuar rënien e duhanpirjes si “lajm të mirë për shëndetin publik”, por ka paralajmëruar se varësia nga nikotina mbetet ende një sfidë e madhe.

Qeveria britanike po përgatit Ligjin për Duhanin dhe Vape-t, i cili do të ndalojë shitjen e duhanit për çdo person të lindur pas 1 janarit 2009 dhe do të forcojë rregullat për produktet me nikotinë për të mbrojtur të rinjtë.