Reddit ka paraqitur një sfidë ligjore në Gjykatën e Lartë të Australisë kundër ligjit të ri që ndalon personat nën 16 vjeç të përdorin rrjetet sociale. Platforma, e cila po e zbaton përkohësisht vendimin, argumenton se masa cenon privatësinë dhe të drejtat politike të qytetarëve.

Ligji, i vlerësuar si më i rrepti në botë, kërkon nga dhjetë platforma – përfshirë Facebook, Instagram, Snapchat dhe TikTok – të bllokojnë qasjen për përdoruesit nën moshën 16-vjeçare, pa dhënë as mundësinë e miratimit prindëror.

Sfida e Reddit vjen pas një padie të mëhershme të dy adoleshentëve australianë, të cilët pretendojnë se ndalimi kufizon lirinë e komunikimit mbi çështjet politike. Ndërkohë, qeveria australiane mbetet e palëkundur, duke e cilësuar ligjin si një masë të domosdoshme për mbrojtjen e fëmijëve nga përmbajtjet e dëmshme dhe algoritmet.

Pavarësisht mbështetjes së gjerë nga prindërit dhe figurat publike, kritikët paralajmërojnë se ndalimi mund të shtyjë fëmijët drejt platformave më pak të sigurta dhe të krijojë barriera të panevojshme për komunitetet që varen nga hapësirat online.