TikTok ka nënshkruar një marrëveshje për ndarjen e aseteve të tij në Shtetet e Bashkuara, duke krijuar një entitet të ri të kontrolluar kryesisht nga investitorë amerikanë. Lajmi është bërë i ditur nga CEO i kompanisë, Shou Chew, përmes një memoje të brendshme, e siguruar nga CNN.

Marrëveshja vjen pas ligjit amerikan që kërkon shkëputjen e TikTok-ut nga kompania mëmë ByteDance, ose ndalimin e aplikacionit në SHBA. Sipas planit, aplikacioni TikTok US do të operojë si një ndërmarrje e përbashkët, ku 50% do të zotërohet nga një konsorcium investitorësh amerikanë, përfshirë Oracle, Silver Lake dhe MGX. ByteDance do të mbajë 19.9%, ndërsa pjesa tjetër u takon investitorëve ekzistues të lidhur me kompaninë kineze.

Chew ka theksuar se marrëveshja ende kërkon miratime të mëtejme rregullatore, përfshirë edhe atë nga autoritetet kineze, por synimi është që procesi të përfundojë deri më 22 janar 2026.

Sipas marrëveshjes, të dhënat e përdoruesve amerikanë do të ruhen dhe mbikëqyren nga Oracle, ndërsa entiteti i ri do të jetë përgjegjës për moderimin e përmbajtjes në SHBA. Megjithatë, disa funksione globale si e-commerce dhe reklamat do të vazhdojnë të menaxhohen nga TikTok-u global nën ByteDance.