Qytetet gjermane që për dekada kanë qenë zemra e industrisë së automobilave – Wolfsburg, Ingolstadt dhe Stuttgart – po përballen me rënie të ndjeshme të të ardhurave fiskale. Shkaku kryesor është kriza e shitjeve të kompanive gjigante si Volkswagen, Audi dhe Mercedes, që ka sjellë deficite të mëdha buxhetore për bashkitë.

Autoritetet lokale janë detyruar të marrin masa të ashpra: huamarrje, rritje tarifash dhe shkurtime shpenzimesh. Në Friedrichshafen, tarifat e çerdheve do të rriten ndjeshëm, ndërsa në Ingolstadt janë reduktuar shërbime publike dhe madje është hequr blerja e pemëve të Krishtlindjeve. Kryetarët e bashkive e kanë cilësuar situatën si “krizë të thellë financiare”.

Industria e veturave po kalon transformime të mëdha – rënie të kërkesës në tregje si Kina dhe vonesa në investimet për automjetet elektrike – duke goditur edhe furnizuesit. Si pasojë, deficitet buxhetore po rriten me shpejtësi: në Ingolstadt nga 30 në 88 milionë euro, ndërsa Stuttgart duhet të rishikojë planifikimet për vitet 2026–2027.

Ekspertët paralajmërojnë se, edhe pse këto qytete nuk pritet të humbasin krejtësisht prosperitetin, banorët do të përballen me shkurtime të dukshme të shërbimeve publike dhe rritje të kostove të jetesës në vitet e ardhshme.