Shtatë vende, përfshirë Arabinë Saudite, Turqinë dhe Egjiptin, kanë konfirmuar se do t’i bashkohen nismës së presidentit amerikan Donald Trump, të quajtur “Bordi i Paqes”, sipas një deklarate të përbashkët. Grupit i është bashkuar edhe Izraeli, i cili e kishte konfirmuar pjesëmarrjen më herët.

Sipas Arabisë Saudite, vendet me shumicë myslimane që janë pjesë e kësaj nisme synojnë forcimin e armëpushimit në Gaza, mbështetjen e procesit të rindërtimit dhe avancimin e një paqeje të qëndrueshme dhe të drejtë.

Presidenti Trump ka deklaruar se edhe presidenti rus Vladimir Putin ka pranuar ftesën, por Kremlini ka sqaruar se Rusia ende po e shqyrton pjesëmarrjen. Ndërkohë, disa shtete si Kanadaja dhe Mbretëria e Bashkuar nuk kanë dhënë ende qëndrim publik.

“Bordi i Paqes” është paraparë të funksionojë si një organizatë ndërkombëtare me rol në ndërtimin e paqes, ndërsa nisma ka shkaktuar reagime të ndryshme për shkak të ndikimit të saj të mundshëm në rendin ndërkombëtar dhe rolin e Kombeve të Bashkuara.