Konsumimi i përditshëm i kafesë ose çajit me kafeinë mund të lidhet me shëndet më të mirë kognitiv në afat të gjatë, sipas një studimi të ri të publikuar në revistën shkencore JAMA.

Hulumtimi tregon se personat që konsumonin dy deri në tre filxhanë kafe ose një deri në dy filxhanë çaj në ditë kishin përfitimet më të mëdha. Sipas autorit kryesor të studimit, Dr. Daniel Wang nga Harvard T.H. Chan School of Public Health, pijedashësit e kafesë në moshën e mesme kishin rreth 18% më pak rrezik për zhvillim të demencës, ndërsa te çaji rreziku ishte 14% më i ulët.

Studimi u bazua në të dhënat e mbi 130,000 pjesëmarrësve nga Nurses’ Health Study dhe Health Professionals Follow-up Study. Megjithatë, përfitime të ngjashme nuk u vërejtën te pijet pa kafeinë.

Ekspertët theksojnë se studimi është vëzhgues dhe nuk provon se kafeina është shkaku i drejtpërdrejtë i mbrojtjes së trurit. Ata paralajmërojnë se nuk ka nevojë të rritet konsumi i kafesë apo çajit vetëm për këtë arsye, veçanërisht për personat me ankth, probleme me gjumin ose çrregullime të ritmit të zemrës.

Sipas specialistëve, kafeja dhe çaji mund të jenë pjesë e një stili jetese të shëndetshëm, por faktorë si aktiviteti fizik, gjumi i mirë, ushqimi cilësor dhe angazhimi social mbeten shumë më të rëndësishëm për shëndetin e trurit.