Regjisori Dan Trachtenberg ka konfirmuar se nuk ka ndërmend të largohet nga universi i “Predator”, pavarësisht marrëveshjes së re që ka nënshkruar me Paramount për projekte të ardhshme si producent dhe regjisor.

Trachtenberg, i cili drejtoi sukseset kritike Prey (2022), Killer of Killers dhe Badlands, deklaroi se aktualisht ndodhet në fazën e zhvillimit të ideve të reja për kapitullin e ardhshëm të franchise-it. Sipas tij, projektet me Paramount dhe vazhdimi i “Predator” do të ecin paralelisht, ndërsa sfida kryesore mbetet koordinimi i kohës.

Regjisori theksoi se synon të sjellë një qasje të freskët në serinë sci-fi, duke eksploruar elemente që nuk janë parë më parë në këtë univers. Ndër projektet e mundshme përmendet edhe Prey 2, me rikthimin potencial të Amber Midthunder në rolin e Naru.

Pas suksesit të Badlands, i cili performoi fuqishëm në arkëtime, ekzistojnë gjithashtu spekulime për zgjerimin e mëtejshëm të universes, përfshirë mundësinë e një tjetër përballjeje “Alien vs. Predator”.

Me deklaratat e fundit të Trachtenberg, duket se seria “Predator” do të vazhdojë të zhvillohet nën drejtimin e tij krijues, ndërsa regjisori paralelisht eksploron projekte të reja në Hollywood.