Mijëra familje në Kosovë vazhdojnë të mbështeten nga skema e ndihmës sociale, duke reflektuar sfidat e vazhdueshme ekonomike dhe sociale në vend.

Sipas të dhënave të Agjencia e Statistikave të Kosovës (ASK), numri i familjeve përfituese ka shënuar një rënie të lehtë gjatë muajve të parë të vitit. Në janar janë regjistruar 16,110 familje përfituese, në shkurt 15,872, ndërsa në mars ky numër ka rënë në 15,595.

Komuna me numrin më të madh të përfituesve mbetet Mitrovica, me mbi 1,500 familje, e ndjekur nga Vushtrria, Gjakova, Peja dhe Prishtina.

Në anën tjetër, komunat me numrin më të ulët të përfituesve janë Juniku, Mamusha dhe Parteshi.

Megjithëse trendi tregon një ulje të lehtë, niveli i përfituesve mbetet i lartë, duke reflektuar nevojën për përmirësim të kushteve ekonomike dhe sociale në vend.