Universi i famshëm i The Godfather do të zgjerohet sërish me një histori të re, kësaj radhe përmes një romani që pritet të publikohet në vitin 2027.

Sipas Associated Press, shtëpia botuese Random House ka siguruar të drejtat për romanin “Connie”, i autorizuar nga trashëgimia e autorit Mario Puzo. Libri është shkruar nga Adriana Trigiani dhe fokusohet te Constanzia “Connie” Corleone, motra e Michael Corleone.

Romani do të sjellë një perspektivë të re në familjen Corleone, duke treguar historinë e Connie si një grua që përpiqet të gjejë rrugën e saj në një botë të dominuar nga pushteti dhe familja e saj e fuqishme kriminale.

“The Godfather” mbetet një nga trilogjitë më të vlerësuara në historinë e kinemasë, me disa çmime Oscar dhe ndikim të madh kulturor që nga filmi i parë i vitit 1972.

Publikimi i “Connie” pritet të hapë diskutime të reja për mundësinë e adaptimeve të ardhshme filmike nga ky univers i njohur.