Rihanna i ka befasuar fansat me një paraqitje të rrallë në koncertin përmbyllës të Jay-Z në Yankee Stadium në New York, duke ndezur atmosferën para mijëra të pranishmëve. Këngëtarja iu bashkua reperit në skenë për të interpretuar hitet "B*tch Better Have My Money" dhe "Run This Town", një nga bashkëpunimet e tyre më të suksesshme. Performanca u prit me ovacione nga publiku, ndërsa pamjet u bënë menjëherë virale në rrjetet sociale.

Koncerti ishte pjesë e serisë "Extra Innings", të organizuar për të shënuar 30-vjetorin e albumit debutues të Jay-Z, "Reasonable Doubt". Gjatë tri netëve të eventit performuan edhe emra të mëdhenj si Beyoncé, Blue Ivy Carter, Eminem, Pharrell Williams, Nas dhe Alicia Keys. Rihanna dhe Jay-Z kanë një histori të gjatë bashkëpunimi, pasi ishte pikërisht Jay-Z ai që ndihmoi në nisjen e karrierës së saj muzikore, ndërsa dyshja kanë sjellë disa prej hiteve më të njohura në muzikën ndërkombëtare.