Disa investitorë të startup-it të shëndetit mendor Wondermind, të bashkëthemeluar nga Selena Gomez, kanë ngritur padi ndaj këngëtares, duke pretenduar se janë mashtruar për suksesin e kompanisë dhe për përfshirjen e saj në biznes.

Pesë investitorë pretendojnë se kanë investuar gjithsej 1.2 milionë dollarë në vitin 2022, duke besuar se Gomez do të përdorte famën dhe ndjekësit e saj në rrjetet sociale për ta zhvilluar kompaninë.

Sipas padisë, investitorët ishin informuar se Wondermind kishte një vlerësim prej 95 milionë dollarësh dhe se priteshin bashkëpunime me kompani të mëdha, marrëveshje reklamimi, projekte mediatike dhe një aplikacion.

Paditësit pretendojnë se këto projekte nuk u realizuan dhe se kompania ishte në vështirësi financiare, ndërsa ata nuk ishin informuar për situatën.

Në padi janë përfshirë edhe Mandy Teefey, nëna e Selena Gomez dhe bashkëdrejtuese e kompanisë, si dhe ish-partnerja e biznesit, Daniella Pierson. Investitorët kërkojnë kthimin e parave të investuara, dëmshpërblim dhe shpenzimet ligjore.

Pierson i ka mohuar akuzat, duke deklaruar se nuk ka përdorur paratë e investitorëve për shpenzime personale dhe se është e gatshme të paraqesë dokumentet financiare.

Selena Gomez, Mandy Teefey dhe Wondermind nuk kanë dhënë ende një përgjigje publike për padinë.