Filmi i ri i Robert De Niros, The Whisper Man, po shënon një rritje të madhe të shikueshmërisë në Netflix, vetëm pak ditë pas publikimit.

Thrilleri kriminal, i cili u publikua më 28 gusht, ka grumbulluar 33.4 milionë shikime dhe rreth 63.5 milionë orë shikim gjatë periudhës 28 gusht–6 shtator. Filmi renditet në vendin e parë në listën globale të 10 filmave më të shikuar të Netflix-it.

The Whisper Man shënon një rritje prej rreth 70% të shikueshmërisë krahasuar me periudhën e mëparshme. Në fundjavën e parë kishte regjistruar 23.2 milionë shikime.

Në film, De Niro luan ish-detektivin Peter Willis, i cili rikthehet në veprim pasi një rast i ri lidhet me një vrasës serial të arrestuar prej tij vite më parë.

Edhe pse filmi po tërheq shumë shikues, pritja nga kritikët ka qenë më e ftohtë. The Whisper Man ka aktualisht 46% në Rotten Tomatoes, ndërsa vlerësimi i publikut është 40%.

Megjithatë, interesi i madh i publikut e ka bërë filmin një prej produksioneve më të suksesshme të Netflix-it në javët e fundit.