Mbreti Charles III do të presë këtë të enjte një samit të posaçëm në Britani, ku përfaqësues të kompanive të mëdha të inteligjencës artificiale, qeverisë dhe organizatave humanitare do të diskutojnë mënyrën se si AI mund të përdoret në dobi të shoqërisë.

Takimi synon të shqyrtojë mundësinë e krijimit të një grupi parimesh të përbashkëta, që do të shërbejnë si udhëzues për zhvillimin dhe përdorimin e teknologjive të AI në mënyrë të sigurt dhe të dobishme për njerëzit dhe mjedisin.

Charles pritet të marrë pjesë vetëm për rreth 20 minuta, ndërsa në listën e të ftuarve janë edhe ministri britanik për AI, Kanishka Narayan, si dhe përfaqësues të kompanive Nvidia, Google DeepMind, OpenAI dhe Anthropic.

Në takim pritet të marrin pjesë edhe drejtori ekzekutiv i Nvidia, Jensen Huang, themeluesi i Google DeepMind, Demis Hassabis, si dhe këshilltari i Vatikanit për AI, Paolo Benanti.

Mbreti Charles ka folur rrallë për inteligjencën artificiale, por në deklaratat e tij të mëparshme ka paralajmëruar për sfidat që sjell kjo teknologji. Në samitin britanik për sigurinë e AI në vitin 2023, ai bëri thirrje për mbrojtjen e privatësisë, vendeve të punës dhe demokracisë.

Takimi zhvillohet në një kohë kur shqetësimet për sigurinë e AI janë rritur. Drejtues të kompanive të mëdha të teknologjisë kanë diskutuar publikisht nevojën që zhvillimi i modeleve të avancuara të AI të ecë me më shumë kujdes dhe me masa më të forta sigurie.