Kombëtarja e Kosovës në futboll sonte nis kapitullin e ri në Ligën e Kombeve, ku në stadiumin “Fadil Vokrri” pret Irlandën.

“Dardanët” kanë zhvilluar përgatitjet gjatë ditëve të fundit, ndërsa përzgjedhësi Franco Foda ka thënë se skuadrën e presin katër ndeshje të vështira. Sipas tij, Austria është favorite e grupit, ndërsa objektivi i Kosovës është fillimisht ruajtja e statusit në Ligën B dhe më pas synimi për ngjitje.

Në prag të ndeshjes, Foda ka konfirmuar edhe ndryshimin në hierarkinë e kapitenëve. Shiritin do ta mbajë Vedat Muriqi, ndërsa Mërgim Vojvoda do të jetë zëvendëskapiten.

Përzgjedhësi i Irlandës, Heimir Hallgrímsson, ka vlerësuar Muriqin dhe lojtarët e tjerë të Kosovës, duke theksuar se “Dardanët” kanë futbollistë cilësorë.

Ndeshja Kosovë–Irlandë zhvillohet sonte në stadiumin “Fadil Vokrri”, me fillim nga ora 20:45.