Pas publikimit të rezultateve të testit “PISA 2022”, sot, nga Ministria e Arsimit për renditjen e Kosovës në listën e dhjetëshes së fundit nga 80 vende, ka reaguar Organizata për Rritjen e Cilësisë në Arsim (ORCA).

Sipas kësaj organizate këto rezultate tregojnë se analfabetizmi funksional si edhe numri i nxënësve që nuk kuptojnë të lexuarit fatkeqësisht është rritur, krahasuar me vitin 2018.

 “Me shqetësim të madh, por të pabafesuar pranuam rezultatet e ‘PISA 2022’ të cilat u publikuan para 1 ore në Paris nga OECD. Kosova ka shënuar rënie si nga rangimi ashtu edhe në performancë. Në vitin 2018 morën pjesë 74 vende dhe Kosova renditej e 72-ta ku 66% e nxënësve shënonin performancë të dobët, ndërkaq në vitin 2022 morën pjesë 80 vende dhe Kosova renditet e 79-ta pra e parafundit, ku 72.9% të nxënësve shënuan performancë të dobët”, thuhet në reagim.

Tutje theksohet se analfabetizimi është rritur. “Analfabetizmi funksional është rritur fatkeqësisht, numri i nxënësve që nuk kuptojnë të lexuarit, nga 78% sa ka qenë në vitin 2018 është rritur në 83% në vitin 2022. Në matematikë kriza është thelluar, nxënësit kosovarë që kanë performuar nën nivel janë rritur nga 76% sa ishin në vitin 2018, në 85% në vitin 2022. Ndërsa në shkencë nga 76% në vitin 2018, numri i performuesve të dobët është rritur në 79% në vitin 2022”, thuhet në këtë reagim.

“ORCA shpreson që këto rezultate ta këndellin Kryeministrin e Republikës dhe Qeverinë e tij, ndonëse nuk beson se një gjë e tillë do të ndodhë pasë parasysh orientimin e Qeverisë, e cila nuk konsiston në reforma radikale, por vetëm në fasadë që në ditë si kjo shembet para syve tanë”, thuhet në reagim.