Komisioni për Arsim, Shkencë, Teknologji, Inovacion, Kulturë, Rini dhe Sport, ka mbajtur dëgjim publik lidhur me projektligjin për tekste shkollore, në të cilën u dhanë komentet e sugjerimet në lidhje me projektligjin.

"Projektligji për tekstet shkollore do të rrit cilësinë dhe rezultatet në arsim". Kështu deklaroi ministrja e Arsimit, Arbërie Nagavci, në dëgjimin publik për projektligjin për tekste shkollore.

“Ky projektligj ka për qëllim caktimin e normave për hartimin e teksteve shkollore në arsimin parauniversitar si i tillë paraqet një legjislacion të rëndësishëm, në të janë përfshirë ekspertë vendorë e ndërkombëtarë, përfaqësues akademikë. Ky projektligj rrit cilësinë, transparencën, dhe rezultatet e nxënësve”, ka thënë Nagavci.

Gjatë diskutimeve u kërkua më shumë qartësi për projektligjin.

“Kemi nevojë për një qartësi më të madhe, p.sh çështja e nenit të tretë, paragrafi i dytë, çdo tekst shkollor, neni 9 flet për klasën parafillore, ndërlidhet me ligjin për fëmijëri të hershme, neni 12 flet për lektyra shkollore”, ka thënë Selim Mehmeti nga Instituti Pedagogjik i Kosovës

“Duhet mi dallu librat 1-5 dhe 6-11, testet 1-5 përmbajnë më shumë figura andaj konkursi për autorë mendoj se do duhej të ishte i dyti jo i pari”, ka thënë Ilir Mazreku, autor.

“Ajo çka e kam pa është se botuesit janë përjashtuar nga ky proces e për mua është shqetësuese, dhe ne po e ndryshojmë traditën e disa viteve dhe mendoj se po hyjmë në qorrsokak”, ka thënë Arbër Jashari, avokat.

Anëtarja e Komisionit për Arsim, Arjeta Rexhepi, njoftoi së Grupi punuës do t’i pranoi komentet me shkrim deri të hënën./rtk/