Demi Moore ka shkruar historinë e saj duke fituar për herë të parë një çmim Golden Globe. Ajo u nderua si aktorja më e mirë në një film muzikor ose komedi për rolin e saj në “The Substance.”

“Me të vërtetë nuk e prisja. Jam ende në shok,” tha Moore gjatë pranimit të çmimit. “E kam bërë këtë punë për më shumë se 45 vjet, dhe është hera e parë që fitoj diçka si aktore. Ndihem e përulur dhe jashtëzakonisht mirënjohëse.”

Moore, 62 vjeç, kujtoi një moment nga karriera e saj, rreth 30 vite më parë, kur një producent e quajti “aktore e kinemasë popullore.”
“Atëherë, e mora si diçka që më ndalonte të arrija këtu ku jam sot. E besova këtë, dhe me kalimin e kohës filloi të më gërryej, deri në atë pikë sa disa vite më parë mendova se ndoshta karriera ime kishte përfunduar,” shtoi ajo.

Skenari i filmit “The Substance” erdhi në duart e saj gjatë një periudhe të vështirë.
“Ky skenar i magjishëm, i guximshëm dhe i jashtëzakonshëm më tregoi se universi më kishte lënë një mesazh: nuk ke mbaruar ende,” tha Moore.

Familja dhe miqtë e aktores festuan me entuziazëm fitoren e saj, duke ndarë një video emocionuese në Instagram me mbishkrimin: “Ajo ia doli!”

“The Substance,” një film me nota feministe, është një fabelë e errët për rreziqet e ndjekjes së verbër të rinisë. Filmi është shkruar dhe drejtuar nga Coralie Fargeat nga Franca.

Në fund, Moore ndau një mesazh të fuqishëm nga filmi:
“Në ato momente kur mendojmë se nuk jemi mjaftueshëm të mençur, të bukur, të dobët, ose të suksesshëm, një grua më tha: ‘Dije se nuk do të jesh kurrë mjaftueshëm, por mund të njohësh vlerën e vetes nëse lë mënjanë matjen me shkopin e krahasimit.’”