Beyoncé ka falënderuar Sir Paul McCartney për krijimin e këngës ikonike “Blackbird”, të cilën e interpretoi në mënyrë mahnitëse gjatë koncertit të saj të fundit në Londër, në stadiumin Tottenham Hotspur, në kuadër të turneut Cowboy Carter.

“Faleminderit, Sir Paul McCartney, që shkruajte njërën nga këngët më të mira ndonjëherë. Çdo herë që e këndoj, ndjehem e nderuar”, shkroi Beyoncé në Instagram. Ajo shtoi gjithashtu se ishte një moment i veçantë që performoi veshur me një kostum të personalizuar nga vajza e McCartney-t, Stella.

Artistja falënderoi gjithashtu publikun britanik për mikpritjen: “Faleminderit, Londër, që krijove kujtime të paharrueshme për mua dhe familjen time. Do të shihemi sërish në turne!”

Në albumin e saj të fundit Cowboy Carter, Beyoncé ka regjistruar një version të ri të “Blackbird”, të titulluar Blackbiird, në bashkëpunim me artiste të zhanrit country me ngjyrë si Brittney Spencer dhe Reyna Roberts.