Ekspertët po paralajmërojnë se disa nga ilaçet më të përdorura, përfshirë ato për depresion, ADHD, tension të lartë dhe sëmundje të zemrës, mund ta bëjnë organizmin më të ndjeshëm ndaj temperaturave të larta.

Disa prej këtyre barnave mund të ndikojnë në mënyrën se si trupi rregullon temperaturën, prodhon djersë ose ruan lëngjet. Kjo mund të rrisë rrezikun për dehidratim, çrregullime të elektroliteve dhe probleme të tjera të lidhura me nxehtësinë.

Ndër ilaçet që mund të kenë ndikim janë disa antidepresivë, ilaçet stimuluese për ADHD, diuretikët, disa barna për tensionin e lartë dhe beta-bllokuesit.

Rreziku mund të jetë më i madh te personat e moshuar dhe te ata që përdorin disa ilaçe njëkohësisht.

Mjekët këshillojnë që gjatë temperaturave të larta të konsumohet mjaftueshëm lëngje, të shmanget ekspozimi i gjatë në diell dhe të monitorohen shenjat si marramendja, konfuzioni, dobësia e madhe ose rrahjet e shpejta të zemrës.

Ekspertët theksojnë se barnat nuk duhet të ndërpriten vetë për shkak të vapës. Çdo ndryshim në trajtim duhet të bëhet vetëm pas konsultimit me mjekun.