Kenia po përballet me shpërthimin e parë të Ebolës në vend, me nëntë raste të konfirmuara, ndërsa autoritetet kanë shtuar masat për të parandaluar përhapjen e virusit.

Sipas BBC-së, personi i parë i infektuar kishte udhëtuar nga Republika Demokratike e Kongos dhe vdiq dy javë më parë. Të infektuarit e tjerë përfshijnë katër familjarë të tij, tre punonjës shëndetësorë dhe një punëtor pastrimi në spital.

Kenia ka forcuar kontrollet shëndetësore në aeroporte dhe pika kufitare, ndërsa personat që kanë pasur kontakt me të infektuarit po gjurmohen dhe izolohen. Autoritetet kanë bërë të ditur se 134 nga 135 kontaktet e identifikuara të pacientit të parë janë vendosur në karantinë.

Virusi i identifikuar i përket llojit Bundibugyo, për të cilin aktualisht nuk ka vaksinë apo trajtim të miratuar. Ndërkohë, autoritetet shëndetësore po bashkëpunojnë me Organizatën Botërore të Shëndetësisë dhe partnerë të tjerë ndërkombëtarë për të kufizuar përhapjen.

Pavarësisht shqetësimeve, Kenia nuk ka vendosur ndalim të përgjithshëm të udhëtimeve dhe ka bërë thirrje që qytetarët të qëndrojnë të qetë, të ndjekin udhëzimet shëndetësore dhe të raportojnë rastet e dyshimta.