Filmi “It Ends With Us” vazhdon të shoqërohet me drama dhe beteja ligjore. Pas akuzave të Blake Lively për ngacmim seksual ndaj Justin Baldonit dhe kundër-padisë 400 milionë dollarëshe të tij (e cila u rrëzua në qershor), tani në çështje është përfshirë edhe aktorja Isabela Ferrer.

Ferrer, që luan versionin e ri të personazhit të Blake Lively në film, ka ngritur padi kundër Baldonit duke e akuzuar për sjellje të papërshtatshme, manipulim dhe kërcënime pasi ajo u thirr si dëshmitare në gjyq. Sipas avokatëve të saj, Baldoni dhe kompania e tij e prodhimit kërkuan kushte të padrejta për të mbuluar shpenzimet e saj ligjore dhe më pas nisën një padi ndaj saj, gjë që u cilësua si tentativë për ta frikësuar.

Aktorja thotë se pas këtyre zhvillimeve ka marrë edhe kërcënime e mesazhe online. Ndërkohë, gjyqi i madh mes Blake Lively dhe Justin Baldonit është caktuar për mars 2026, duke e bërë këtë një nga konfliktet më të bujshme ligjore në Hollywood. Pra, ndërsa filmi “It Ends With Us” ishte menduar të ishte një histori suksesi, tashmë është kthyer në një sagë gjyqësore që po tërheq më shumë vëmendje se vetë projekti. Me përfshirjen e emrave të mëdhenj si Blake Lively, Ryan Reynolds dhe Justin Baldoni, kjo betejë ligjore pritet të ndiqet me interes të madh deri në përfundim.