Aktori amerikan Richard Riehle, i njohur për rolet në filmin Office Space dhe serialin e animuar The Legend of Korra, ka vdekur në moshën 78-vjeçare.

Sipas mediave amerikane, miqtë e aktorit kanë konfirmuar se ai vdiq më 15 tetor në Los Angeles, për shkaqe natyrore.

Gjatë karrierës së tij, Riehle ishte pjesë e më shumë se 400 produksioneve filmike dhe televizive. Ndër rolet e tij më të njohura është Tom Smykowski në komedinë Office Space, si dhe zëri i Bumit në serialin e animuar The Legend of Korra.

Ai u shfaq gjithashtu në filma të njohur si The Fugitive, Casino, Lethal Weapon 4 dhe Bridesmaids. Përveç roleve në film dhe televizion, Riehle u bë i njohur edhe për interpretimin e Santa Claus-it në disa produksione festive.

I lindur më 12 maj 1948 në Wisconsin, Riehle ndërtoi një karrierë të gjatë në teatër, film dhe televizion, duke u bërë një aktor i dallueshëm në shumë produksione të njohura.