Në vitin 1914, vetëm dy vite pas lundrimit tragjik të Titanikut, anija me avull SS Medina u nis nga SHBA-të për një udhëtim që do të zgjaste mbi një shekull. Fillimisht përdorej për transport mallrash, më pas mori pjesë në Luftën e Dytë Botërore, u shndërrua në anije pasagjerësh, në anije misionare dhe bibliotekë lundruese, duke udhëtuar mbi 360,000 milje detare dhe duke vizituar më shumë se 100 shtete.

Pas shumë emrave e roleve, sot ajo njihet si Doulos Phos – Servant of Light dhe ndodhet në tokë, në ishullin Bintan të Indonezisë, ku është transformuar në një hotel luksoz. Pronari i saj aktual, biznesmeni singapuras Eric Saw, ka investuar rreth 18 milionë dollarë për ta shpëtuar nga skrapi dhe për ta kthyer në atraksion turistik.

Hoteli ka mbi 90 kabina, disa me dritare rrethore tradicionale të anijeve, të tjera me ballkone me pamje nga deti. Në brendësi, ende ruhen elementë origjinalë si motorët, boshti i helikës dhe varkat e shpëtimit, duke kombinuar luksin modern me historinë detare.

Pas një fillimi të vështirë në vitin 2019, të ndalur nga pandemia, Doulos Phos The Ship Hotel sot mirëpret vizitorë nga e gjithë bota – nga familjet në pushime, tek të apasionuarit pas historisë së anijeve. Për shumë prej tyre, qëndrimi nuk është thjesht një natë në hotel, por një udhëtim në kohë.