Presidenti amerikan, Donald Trump, ka propozuar që shteti i New Mexico-s të ndryshojë emrin në “New America”, duke pretenduar se ai duhet të pasqyrojë më mirë përkatësinë e tij në Shtetet e Bashkuara.

“New Mexico duhet ta ndryshojë menjëherë emrin në New America. Ne nuk jemi Meksikë, ne jemi Shtetet e Bashkuara të Amerikës!”, ka shkruar Trump në rrjetin e tij social, Truth Social.

Trump ka pretenduar gjithashtu se ndryshimi i emrit do të rriste vlerën e pronave dhe të ardhurat, pa paraqitur prova për këto pohime.

Megjithatë, presidenti amerikan nuk ka kompetencë kushtetuese për ta ndryshuar i vetëm emrin e një shteti amerikan. Një ndryshim i tillë duhet të bëhet përmes procedurave brenda vetë shtetit.

Guvernatorja demokrate e New Mexico-s, Michelle Lujan Grisham, e ka kundërshtuar propozimin, duke theksuar se emri i shtetit ekzistonte shumë kohë para themelimit të Shteteve të Bashkuara.

Emri New Mexico ka rrënjë historike që datojnë që nga shekulli i 16-të. Propozimi i Trumpit vjen pas nismave të tij të mëparshme për ndryshimin e emrave të disa vendndodhjeve gjeografike, përfshirë Gjirin e Meksikës, të cilin ai e ka quajtur “Gjiri i Amerikës”.