Jerry Adler, i njohur për rolin e Hesh Rabkin në serialin legjendar The Sopranos, ka ndërruar jetë në moshën 96-vjeçare. Lajmi u konfirmua nga familja përmes Riverside Memorial Chapel në New York.

Adler kishte një karrierë të gjatë e të larmishme që nisi shumë përpara se të hynte para kamerave. Ai ishte pjesë e 53 produksioneve në Broadway, ku shërbeu si menaxher skene, producent dhe regjisor, përfshirë produksionin origjinal të My Fair Lady. Gjatë viteve punoi me emra të mëdhenj si Marlene Dietrich, Julie Andrews dhe Richard Burton.

Vetëm në moshën 60-vjeçare, Adler nisi karrierën si aktor, fillimisht me një rol në filmin The Public Eye përkrah Joe Pesci-t, dhe më pas me seriale televizive si Northern Exposure, The Sopranos, The Good Wife, Rescue Me, Transparent e shumë të tjera. Ai u rikthye edhe në skenën e Broadway-t si aktor në vitin 2000 me shfaqjen Taller Than a Dwarf, dhe më pas në Fish in the Dark të Larry David.

Në një intervistë, ai pati thënë: “Nuk do ta dija çfarë të bëja nëse do të isha në pension. Besoj se pensioni është një rrugë drejt askundit.”
Në vitin 2024, Adler botoi kujtimet e tij “Too Funny for Words: Backstage Tales from Broadway, Television and the Movies”, duke përmbledhur një jetë të tërë mes teatrit dhe ekranit.

Me një karrierë që përfshiu shtatë dekada dhe dy faza krejt të ndryshme – nga Broadway tek Hollywood – Jerry Adler mbetet një shembull i rrallë i pasionit dhe qëndrueshmërisë artistike.