Southwest Airlines ka njoftuar një ndryshim të rëndësishëm në politikat e saj, duke kërkuar që pasagjerët plus-size të blejnë paraprakisht një ulëse shtesë nëse nuk përshtaten brenda krahëve të ulëses. Rregulli i ri hyn në fuqi më 27 janar, në të njëjtën ditë kur kompania nis edhe politikën e re të ulëseve të caktuara.

Deri tani, udhëtarët kishin mundësi të merrnin një vend shtesë falas në aeroport ose ta blinin paraprakisht me opsion rimbursimi. Me ndryshimet e fundit, kompania thotë se rimbursimi do të bëhet vetëm nëse fluturimi nuk është i mbushur plotësisht dhe nëse biletat janë blerë në të njëjtën kategori. Në rast se pasagjeri nuk ka blerë vend shtesë paraprakisht dhe fluturimi është i tejmbushur, ai do të duhet të ri-caktohet në një fluturim tjetër.

Jason Vaughn, një agjent udhëtimesh nga Orlando dhe krijues i faqes “Fat Travel Tested”, tha se ky ndryshim mund të ndikojë negativisht jo vetëm tek pasagjerët plus-size, por tek të gjithë udhëtarët. Ai e quajti këtë vendim “një tjetër zhgënjim për besnikët e Southwest”, duke shtuar se kompania ka humbur identitetin që e bënte të veçantë.

Këto masa vijnë në një kohë kur Southwest është nën presion nga investitorët për të rritur të ardhurat dhe fitimet, ndërkohë që tashmë ka nisur të ofrojë shërbime shtesë me pagesë, përfshirë më shumë hapësirë për këmbët dhe fluturime gjatë natës.