Ky shpërthim, i quajtur FRB 20250316A dhe i pagëzuar me nofkën “RBFLOAT” (Radio Brightest Flash Of All Time), u zbulua më 16 mars nga teleskopi CHIME në Kanada dhe rrjeti i tij i ri i teleskopëve të quajtur Outriggers. Burimi u identifikua në galaktikën NGC 4141, rreth 130 milionë vite dritë larg Tokës.

FRB-të zgjasin vetëm disa milisekonda, por lëshojnë energji të jashtëzakonshme. Në këtë rast, fuqia e shpërthimit ishte e barabartë me prodhimin e energjisë së diellit për katër ditë – të gjitha të përqendruara në më pak se një sekondë.

Për herë të parë, teleskopi hapësinor James Webb u përdor menjëherë pas sinjalit për të vëzhguar vendndodhjen e saktë të shpërthimit. Rezultatet mbështesin teorinë se magnetarët – mbetje të yjeve masivë që shpërthejnë dhe kthehen në yje neutronësh super të magnetizuar – mund të jenë burimi i këtyre sinjaleve misterioze.

Përveç zbulimit të madh, astronomët theksojnë se kjo është hera e parë që një shpërthim i tillë është lokalizuar me kaq saktësi, deri në një rajon prej vetëm 45 vite-dritë. Kjo do të ndihmojë shkencën të kuptojë më mirë nëse FRB-të përsëriten si një “rrahje zemre kozmike” apo janë ngjarje të vetme shpërthyese.

Zbulimi është botuar në revistën The Astrophysical Journal Letters dhe pritet të hapë një epokë të re në kërkimet mbi misteret e universit.