Pas dekadash ndalimi, parlamenti i Koresë së Jugut pritet të votojë së shpejti një projektligj që do të legalizojë tatuazhet – një praktikë që deri tani është lejuar vetëm për mjekët e licencuar. Vendimi mund të sjellë ndryshime historike për një industri që ka funksionuar kryesisht në ilegalitet.

Tatuazhet, megjithëse nuk janë të ndaluara për qytetarët, janë realizuar shpesh në kushte të fshehta. Artistë si Kim Chan-hoe dhe kolegët e tij janë përballur me gjoba dhe hetime, por kanë vazhduar të krijojnë art që tashmë është i njohur edhe ndërkombëtarisht.

Industria e tatuazheve në Korenë e Jugut vlerësohet me qindra milionë dollarë dhe ka rreth 20 mijë artistë aktivë. Nga tatuazhet “fine line” të preferuara nga të rinjtë, deri te stilet neotradicionale apo kozmetike, kjo fushë është bërë pjesë e pandashme e kulturës urbane.

Nëse ligji miratohet, qeveria do të ketë dy vite kohë për të krijuar rregullore të reja mbi higjienën, licencimin dhe standardet e sigurisë. Për artistët, kjo do të thotë njohje zyrtare e profesionit të tyre pas dekadash pune në hije.

“Dikush që vizaton në letër quhet artist, po ashtu edhe dikush që vizaton në lëkurë,” tha Kim. “Është koha që tatuazhet të njihen si art edhe ligjërisht.”