Rregullat e reja për udhëtimin e qytetarëve kinezë jashtë dhe brenda vendit kanë hyrë në fuqi, duke zgjeruar mundësitë e autoriteteve për t’ua ndaluar daljen nga Kina.

Sipas rregullave, qytetarët që konsiderohen se kanë dëmtuar sigurinë ose interesat kombëtare të Kinës gjatë qëndrimit jashtë vendit, mund të ndalohen të largohen nga shteti deri në tre vjet pas kthimit. Kufizime mund të vendosen edhe ndaj personave që shkelin rregullat për importin dhe eksportin e teknologjisë.

Autoritetet kineze thonë se masat synojnë të mbrojnë sovranitetin dhe sigurinë kombëtare, si dhe të parandalojnë mashtrimet, lojërat e paligjshme të fatit dhe aktivitete të tjera të paligjshme jashtë vendit. Ato mohojnë se rregullat kufizojnë udhëtimin e qytetarëve të zakonshëm.

Megjithatë, kritikët thonë se masat mund t’i japin Pekinit më shumë kontroll mbi veprimtarinë dhe deklaratat e qytetarëve të tij jashtë vendit. Eksperti i së drejtës aziatike, Tom Kellogg, i tha BBC-së se këto rregulla mund të përdoren edhe për të ndëshkuar aktivistët që kritikojnë qeverinë kineze.

Të dhënat e siguruara nga organizata Safeguard Defenders tregojnë se ndalimet e daljes nga Kina janë rritur ndjeshëm. Në vitin 2016, databaza e Gjykatës Supreme të Kinës përmbante 89 raste që përmendnin ndalimet e udhëtimit, ndërsa vitin e kaluar kjo shifër arriti në 188,760 raste.

Sipas BBC-së, qytetarët kinezë aktualisht nuk kanë një mënyrë të qartë për të kontrolluar paraprakisht nëse janë subjekt i një ndalimi për të dalë nga vendi.