Ish-presidenti amerikan Donald Trump ka njoftuar një paketë të re tarifash që pritet të ndikojë drejtpërdrejt tregun amerikan të mobilieve dhe automjeteve të rënda. Nga 1 tetori 2025, mbi dollapët e kuzhinës, banjës dhe produktet e ngjashme do të aplikohet një tarifë prej 50%, ndërsa mbi mobiliet e tapetuara 30%.

Sipas të dhënave të Byrosë së Statistikave të Punës në SHBA, çmimet e mobilieve janë rritur me 4.7% në gusht 2025 krahasuar me vitin e kaluar, ndërsa mobiliet e dhomës së ndenjës dhe ngrënies janë shtrenjtuar me 9.5%. Importet nga Kina dhe Vietnami, dy furnizuesit kryesorë të mobilieve për SHBA, janë prekur më shumë nga tarifat e mëparshme.

Trump njoftoi gjithashtu edhe një tarifë prej 25% për kamionët e rëndë të importuar, me qëllim, siç tha ai, mbrojtjen e industrisë vendase dhe sigurisë kombëtare. Megjithatë, analistët theksojnë se tarifat e vendosura më herët mbi çelikun dhe aluminin tashmë kanë rritur kostot e prodhimit edhe për kompanitë amerikane, duke bërë që në disa raste kamionët e prodhuar në SHBA të kushtojnë më shumë se ata të importuar.

Njoftimi vjen pas një hetimi të nisur nga Departamenti i Tregtisë në prill, për të parë nëse importet e kamionëve të mesëm dhe të rëndë përbëjnë kërcënim për sigurinë kombëtare të SHBA-së.