Taylor Swift po dëshmon sërish se nuk është vetëm një yll i muzikës, por edhe një forcë e vërtetë në botën e kinemasë. Pas suksesit të jashtëzakonshëm të koncert-filmit The Eras Tour, i cili mblodhi mbi 260 milionë dollarë në arkat botërore, projekti i saj më i ri kinematografik Taylor Swift: The Official Release Party Of A Showgirl ka arritur të fitojë 46 milionë dollarë vetëm gjatë fundjavës së parë.

Vetëm nga tregu amerikan janë arkëtuar 33 milionë dollarë, ndërsa 13 milionë nga tregjet ndërkombëtare. Projekti 89-minutësh përfshin videoklipe, versionet me tekste të këngëve të albumit të ri The Life Of A Showgirl, si dhe pamje prapa skenave dhe komente nga vetë Swift.

Kjo përvojë muzikore është konceptuar si një mënyrë për fansat që të përjetojnë albumin së bashku, në tingujt e një sistemi zanor kinemaje. Edhe pse nuk është një film tradicional, sukseset e saj në ekranin e madh tregojnë qartë se Taylor Swift është bërë një emër që tërheq audiencën në çdo format.

Nëse çdo videoklip i saj arrin në kinema, nuk është më pyetje “nëse”, por “kur” do ta shohim filmin e parë të Taylor-it në regji të plotë.