Kompania Pinterest ka konfirmuar shkarkimin e dy inxhinierëve, pasi ata krijuan skripte të paautorizuara për të identifikuar punonjësit e prekur nga një raund i fundit i largimeve nga puna.

Sipas kompanisë, inxhinierët kishin aksesuar në mënyrë të papërshtatshme të dhëna konfidenciale dhe i kishin shpërndarë ato më gjerë brenda organizatës, duke shkelur politikat e brendshme dhe privatësinë e punonjësve të larguar.

Pinterest njoftoi më herët se rreth 15% e fuqisë punëtore, afërsisht 700 vende pune, do të preken nga shkurtimet, në kuadër të një strategjie të re që synon fokus më të madh në inteligjencën artificiale.

Ngjarja vjen në një periudhë kur industria globale e teknologjisë po përballet me shkurtime masive të stafit, me kompani të mëdha si Amazon, Meta, Google dhe Microsoft që kanë reduktuar ndjeshëm numrin e punonjësve vitet e fundit.