Presidenti i Shteteve të Bashkuara, Donald Trump, ka njoftuar se do të hiqen tarifat doganore për uiskin irlandez, gjatë vizitës së tij në Irlandë.

Njoftimi u bë gjatë ceremonisë së dorëzimit të trofeut të Irish Open, në fushën e golfit të Trumpit në Doonbeg, ku ai ia dorëzoi trofeun golfistit irlandez Shane Lowry.

Uiski irlandez aktualisht përballet me një tarifë prej 10% për importet në SHBA, si pjesë e tarifave të vendosura ndaj shumicës së produkteve të importuara nga Bashkimi Evropian.

Trump tha se vendimi erdhi pas diskutimeve me kryeministrin irlandez Micheál Martin dhe kërkesave të vazhdueshme për heqjen e tarifave.

Zëvendëskryeministri dhe ministri i Financave i Irlandës, Simon Harris, e cilësoi njoftimin si një vendim me rëndësi ekonomike. Edhe përfaqësues të industrisë së pijeve alkoolike në SHBA e mirëpritën masën.

Megjithatë, ende nuk është bërë e ditur se kur do të hyjë në fuqi heqja e tarifave.