Sezoni i uraganeve në Atlantik po shënon një rekord të pazakontë. Kanë kaluar 103 ditë nga fillimi i sezonit pa u formuar asnjë uragan, periudha më e gjatë e pritjes që nga fillimi i regjistrimeve të besueshme satelitore në vitin 1966.

Deri më tani janë formuar vetëm pesë stuhi tropikale, të cilat kanë qenë jetëshkurtra. Ekspertët e konsiderojnë këtë sezonin më pak aktiv në Atlantik që nga viti 1950.

Arsyeja kryesore lidhet me fenomenin El Niño, i cili ka sjellë erëra të forta në lartësi të ndryshme të atmosferës. Këto ndryshime të erës, të njohura si wind shear, mund të shpërbëjnë sistemet tropikale përpara se të zhvillohen në uragane.

Edhe pse temperaturat e ujërave në Atlantik janë mjaftueshëm të larta për formimin e uraganeve, kushtet atmosferike po e pengojnë këtë proces.

Megjithatë, ekspertët paralajmërojnë se mungesa e uraganeve deri tani nuk do të thotë se rreziku ka kaluar. Më shumë se gjysma e aktivitetit të sezonit zakonisht ndodh pas 10 shtatorit, ndërsa stuhitë e vonshme mund të formohen më afër brigjeve të SHBA-së.