Shoqata e Ndërtimit në Kosovë do të zhvillojë sot një takim zyrtar me ministrin për Punë, Familje dhe Vlerat e Luftës Çlirimtare, Andin Hoti.

Sipas njoftimit, qëllimi i këtij takimi është diskutimi i situatës aktuale në sektorin e ndërtimit, me theks të veçantë në rastet e fundit të humbjeve të jetës në vendin e punës, si dhe në çështjet e sigurisë dhe shëndetit në punë.

Shoqata pritet të paraqesë shqetësimet dhe propozimet konkrete të industrisë, duke synuar rritjen e bashkëpunimit me institucionet përkatëse për parandalimin e fatkeqësive.

Në njoftim theksohet se Shoqata do të luajë një rol aktiv si urë lidhëse mes sektorit të ndërtimit dhe institucioneve shtetërore, me synim ngritjen e standardeve të sigurisë dhe mbrojtjen e jetës së punëtorëve.