Blake Lively ka paraqitur dokumente të reja gjyqësore ku pretendon se ka pësuar dëm reputacional me vlerë rreth 40 milionë dollarë, si pasojë e një fushate PR-je të supozuar nga kompania e Justin Baldoni.

Sipas dokumenteve të raportuara nga Daily Mail, Lively po kërkon dëmshpërblime që mund të variojnë nga rreth 142 milionë deri në afro 300 milionë dollarë nga kompanitë e lidhura me filmin It Ends With Us, përfshirë Wayfarer Studios LLC dhe IEWUM LLC.

Aktorja pretendon se etiketa dhe përshkrimet negative si “mean girl”, “bullizuese” dhe “e pandjeshme” kanë dëmtuar rëndë imazhin e saj publik, duke shkaktuar humbje të konsiderueshme financiare në karrierë dhe reputacion.

Në parashtresën e saj, ajo vlerëson vetëm dëmin e reputacionit në rreth 36.5 deri në 40.5 milionë dollarë, duke e lidhur këtë me miliona shikime të përmbajtjeve negative që janë përhapur online.

Beteja ligjore vazhdon, pasi gjykata ka rrëzuar disa nga pretendimet e saj, përfshirë akuzat për ngacmim seksual, të cilat Baldoni i ka mohuar. Megjithatë, disa akuza të tjera për hakmarrje dhe shkelje kontrate janë ende aktive në proces.