Autorja japoneze Eiko Kadono, krijuesja e romanit të njohur Kiki’s Delivery Service, vazhdon të shkruajë çdo ditë edhe në moshën 91-vjeçare. Shkrimtarja, e cila ka botuar rreth 200 libra, thotë se nuk lodhet kurrë së shkruari dhe se beson ende te fuqia e librave për të nxitur imagjinatën. Romani i saj i vitit 1985 u bë i famshëm në mbarë botën pas adaptimit në film të animuar nga Studio Ghibli në vitin 1989.

Kadono tregon se çdo histori e nis duke shkruar me dorë, ndërsa frymëzimin për personazhin e Kikit e mori nga një vizatim i vajzës së saj. Fituesja e çmimit prestigjioz Hans Christian Andersen në vitin 2018 shprehet se fëmijët e sotëm kanë më pak mundësi të zhvillojnë imagjinatën përmes natyrës, ndaj librat mbeten më të rëndësishëm se kurrë. “Librat janë e vetmja gjë që mund të nxisë krijimtarinë dhe imagjinatën”, thekson ajo.