Spotify ka njoftuar se gjatë 12 muajve të fundit ka larguar më shumë se 75 milionë këngë të konsideruara si spam nga platforma e saj.

Kompania përballet çdo ditë me rreth 100 mijë ngarkime të reja muzikore, ndërsa një pjesë e madhe e këtyre përmbajtjeve krijohen me inteligjencë artificiale.

Spotify thekson se nuk po ndalon përdorimin e inteligjencës artificiale në muzikë, por po lufton atë që e quan “AI slop” – këngë të krijuara masivisht nga programe automatike, të cilat ngarkohen në numër të madh për të manipuluar listat e dëgjimit dhe për të përfituar nga sistemi i pagesave.

Platforma ka prezantuar masa të reja kundër këngëve të kopjuara, publikimeve artificialisht të shkurtra dhe zërave të falsifikuar me AI. Gjithashtu, Spotify do të kërkojë që të bëhet e qartë kur inteligjenca artificiale është përdorur gjatë krijimit të një kënge.

Kompania thotë se muzika e krijuar me ndihmën e AI nga artistë realë do të vazhdojë të jetë e mirëpritur në platformë.