Sony Pictures ka siguruar të drejtat globale për adaptimin filmik të “Ramayana”, një nga veprat më të vjetra dhe më të rëndësishme të letërsisë së lashtë indiane.

Filmi do të tregojë historinë e princit Rama, i cili kalon vite në mërgim, ndërsa bashkëshortja e tij Sita rrëmbehet nga mbreti demon Ravana.

Projekti do të drejtohet nga Nitesh Tiwari dhe në kast janë aktorët Ranbir Kapoor, Yash dhe Sai Pallavi. Filmi do të publikohet në disa gjuhë në mbarë botën, përfshirë edhe versionin në anglisht.

Produksioni përfshin emra të njohur të industrisë së filmit, me muzikë nga fituesit e Oscar-it Hans Zimmer dhe A.R. Rahman, si dhe ekspertë të efekteve vizuale dhe skenografisë.

Prodhuesit thonë se synimi është që kjo histori mijëra-vjeçare të prezantohet për një audiencë globale, duke ruajtur vlerat dhe trashëgiminë e saj kulturore.