Traileri i filmit “Narnia: The Magician’s Nephew” ka regjistruar mbi 481.3 milionë shikime gjatë shtatë ditëve të para, duke u bërë një nga trailerët më të shikuar në këtë periudhë.

Sipas të dhënave të publikuara nga Deadline, filmi me regji dhe skenar të Greta Gerwig ka tejkaluar trailerin e “Barbie”, i cili kishte grumbulluar 240 milionë shikime në shtatë ditë, si dhe atë të “Wonka” dhe “The Super Mario Galaxy Movie”.

Filmi bazohet në romanin e C.S. Lewis, të publikuar më 1955, dhe rrëfen historinë e Digory Kirke dhe shoqes së tij Polly, të cilët nisin një udhëtim nëpër botë magjike. Në kastin e filmit janë Daniel Craig, Emma Mackey, Meryl Streep dhe aktorë të tjerë të njohur.

Një nga elementet që tërhoqi vëmendjen ishte përdorimi i këngës “Stairway to Heaven” nga Led Zeppelin në trailer, pas bindjes së grupit nga regjisorja Gerwig.

Pavarësisht interesimit të madh, traileri ka marrë edhe kritika nga disa fansa, të cilët kanë shprehur shqetësime për ndryshimin e atmosferës tradicionale të filmave “Narnia”.

Filmi pritet të dalë në kinema më 12 shkurt, si pjesë e planit të Netflix për të zgjeruar publikimet në ekranin e madh.