Sony ka nisur një shërbim të ri televiziv falas në PlayStation 5, të financuar përmes reklamave. Shërbimi, i quajtur Live TV on PS5, ofron më shumë se 100 kanale me programe televizive, filma, sport, lajme dhe përmbajtje për gaming.

Në platformë mund të gjenden seriale si “The Walking Dead”, “The Shield”, “Community” dhe “Hell’s Kitchen”, ndërsa adhuruesit e animeve mund të shohin tituj si “Naruto”, “Sailor Moon”, “Hunter x Hunter” dhe “Death Note”.

Përfshirë janë edhe kanale sportive me përmbajtje nga futbolli, MMA, golfi, boksi, hokeji dhe motorsporti, si dhe kanale të lajmeve dhe motit.

Përdoruesit e PS5 mund t’i qasen shërbimit përmes seksionit Media, duke zgjedhur opsionin “Live TV on PS5”. Për momentin, shërbimi është i disponueshëm vetëm në SHBA, ndërsa Sony ka paralajmëruar se synon ta zgjerojë edhe në vende dhe rajone të tjera.

Shërbimi vjen në një kohë kur platformat falas të transmetimit, të financuara nga reklamat, po bëhen gjithnjë e më të njohura për shkak të rritjes së çmimeve të abonimeve në platformat tradicionale të streaming-ut.