Përkthyesit me inteligjencë artificiale po bëhen gjithnjë e më të saktë, por gabimet në dokumentet ligjore, mjekësore dhe tekstet e rëndësishme mund të kenë pasoja serioze.

Sipas një raportimi të BBC-së, sistemet e përkthimit me inteligjencë artificiale mund të përkthejnë gabimisht shprehje idiomatike, terma profesionalë dhe fjalë që marrin kuptime të ndryshme në varësi të kontekstit.

Në përkthimin e dokumenteve ligjore, një gabim mund të ndryshojë kuptimin e një deklarate ose të një kërkese. Ndërsa në fushën e mjekësisë, ngatërrimi i njësive matëse mund të shkaktojë gabime serioze në dozimin e barnave.

Një studim i organizatës Open Knowledge Association, i mbështetur nga Wikimedia, shqyrtoi 119 artikuj në dhjetë kombinime gjuhësh. Sipas John Zimmerman, themeluesit të organizatës, 27 për qind e tekstit të krijuar nga inteligjenca artificiale u korrigjua para publikimit. Në 5 deri në 6 për qind të rasteve, gabimet ndryshuan kuptimin e tekstit origjinal.

Ekspertët theksojnë se përkthimet e gjeneruara nga inteligjenca artificiale mund të duken të natyrshme dhe të sakta, edhe kur përmbajnë gabime të vështira për t'u dalluar.

Për këtë arsye, përkthimi automatik mund të jetë zgjidhje praktike për tekste të zakonshme, por dokumentet ligjore, mjekësore dhe materialet me rëndësi të veçantë kërkojnë ende kontroll profesional njerëzor.