Departamenti i Thesarit i Shteteve të Bashkuara ka shqiptuar një gjobë prej 1.2 miliardë dollarësh ndaj bankës Bank of America, për dështime në identifikimin dhe raportimin e transaksioneve të dyshimta financiare.

Sipas autoriteteve amerikane, banka nuk kishte raportuar transaksione të dyshimta me vlerë mbi 5 miliardë dollarë. Rreth 1 miliard dollarë prej tyre paraqisnin rreziqe për sigurinë kombëtare dhe financat e paligjshme.

Hetimet kanë evidentuar mangësi në kontrollet e brendshme të bankës, përfshirë mosraportimin e transaksioneve që mund të lidhen me rrjete të pastrimit të parave dhe shkelje të mundshme të sanksioneve ndërkombëtare.

Si pjesë e marrëveshjes, Bank of America ka pranuar se ka shkelur me dashje Ligjin për Sekretin Bankar, duke mos mbajtur një program të përshtatshëm kundër pastrimit të parave dhe duke mos përmbushur disa detyrime raportimi.

Gjobat përfshijnë 750 milionë dollarë të shqiptuara nga Zyra e Kontrollorit të Monedhës (OCC), dënimi më i madh i vendosur ndonjëherë nga ky institucion, si dhe masa të tjera të lidhura me shkeljet e mundshme të sanksioneve ndaj Rusisë, Iranit dhe programeve kundër narkotikëve dhe terrorizmit.

Bank of America ka deklaruar se është duke punuar për t'i adresuar çështjet e ngritura nga rregullatorët dhe se ka ndarë burime të konsiderueshme për përmirësimin e kontrolleve të saj.