Kuvendi i Kosovës ka miratuar me 67 vota për një rezolutë që trajton vrasjen e Arlinda Zekajt në Vitomiricë të Pejës, rastet e tjera të vrasjes së grave dhe dhunën në familje.

Rezoluta synon të rrisë përgjegjësinë institucionale dhe të forcojë mekanizmat për parandalimin e dhunës dhe mbrojtjen e viktimave.

Ndër masat e propozuara janë themelimi i një komisioni hetimor parlamentar për të shqyrtuar përgjegjësitë institucionale në rastin e Arlinda Zekajt, krijimi i qendrave shtetërore për strehimin dhe mbrojtjen e grave e fëmijëve, si dhe forcimi i ndihmës juridike falas.

Rezoluta parasheh gjithashtu masa për parandalimin e dhunës në shkolla, trajtimin e dhunës digjitale, krijimin e qendrave referuese për viktimat e dhunës seksuale dhe shqyrtimin e ndryshimeve ligjore, përfshirë përcaktimin e femicidit si vepër të veçantë penale.

Gjatë seancës, kryetarja e Kuvendit, Albulena Haxhiu, kritikoi deputetët që nuk qëndruan në sallë për të votuar rezolutën, duke theksuar se secili duhet ta mbajë përgjegjësinë e vet.