Një studim i ri ka zbuluar se përdorimi i psilocibinës – substancës aktive te kërpudhat e njohura si “magic mushrooms” – është rritur ndjeshëm në SHBA gjatë pesë viteve të fundit, sidomos pas lehtësimit të politikave në disa shtete që nga viti 2019.

Sipas studimit të publikuar në Annals of Internal Medicine, në vitin 2023, përdorimi i psilocibinës është rritur me 188% te të rriturit mbi 30 vjeç dhe me 44% te grupmoshat 18-29 vjeç. Madje, përdorimi ishte më i lartë se ai i kokainës, opioideve të paligjshme, LSD-së apo metamfetaminës.

Përdorimi është përhapur edhe në mesin e adoleshentëve, me një rritje prej 2.4% vetëm te nxënësit e klasës së 12-të në vitin 2023 – një ngritje prej 53% krahasuar me vitin 2018.

Megjithëse ka prova që psilocibina mund të ndihmojë në trajtimin e depresionit, ankthit dhe PTSD-së, ekspertët paralajmërojnë se përdorimi jashtë kushteve klinike është i rrezikshëm. Raportet e rritura në qendrat e helmimeve dhe rastet emergjente tregojnë për rreziqe të mundshme si halucinacione të forta, ndërprerje mendore dhe probleme kardiovaskulare.

“Psilocibina nuk është lodër,” tha Dr. Andrew Monte, një nga autorët e studimit. “Njerëzit duhet të planifikojnë para se të eksperimentojnë – dhe më e rëndësishmja, duhet të kenë dikë pranë në rast se ndodh një reagim i keq.”

Shtetet si Oregon dhe Colorado kanë legalizuar përdorimin në kushte të kontrolluara, ndërsa në qytete të tjera është dekriminalizuar. Megjithatë, shumica e përdoruesve e përdorin ende për qëllime rekreative, edhe nëse kanë probleme të shëndetit mendor – gjë që mund ta rrisë rrezikun për efekte negative.

Studimi sugjeron se nevojitet më shumë kërkim shkencor për të kuptuar përfitimet dhe pasojat e mundshme afatgjata të psilocibinës.