Google është në prag të një ndryshimi të rëndësishëm në motorin e tij të kërkimit, me mundësinë që Inteligjenca Artificiale të bëhet forma e paracaktuar për shfaqjen e rezultateve. Ky hap do të ishte një nga risitë më të mëdha të kompanisë deri më sot.
 
Logan Kilpatrick, menaxher produkti për Google AI Studio, ka ndezur diskutime në rrjetin social X, pas një përgjigjeje të shkurtër që dha ndaj një përdoruesi që pyeti se kur do të aktivizohej “AI Mode” si modaliteti kryesor. “Së shpejti”, tha Kilpatrick, një koment që ngjalli spekulime të shumta.
 
Megjithatë, Robby Stein, zëvendëspresident i Google Search, kërkoi të shuajë shqetësimet duke sqaruar se kompania po punon që Modaliteti AI të jetë lehtësisht i arritshëm për këdo që e dëshiron, por theksoi se “nuk duhet të bëhen interpretime të tepërta”.
 
Modaliteti AI është një veçori e veçantë brenda Google Search që përdor modelin gjuhësor Gemini, duke ofruar përgjigje të shpejta, të qarta dhe në formë bisedore, pa pasur nevojë për të klikuar në disa lidhje të ndryshme për të gjetur informacionin.
 
Ky sistem përdor teknologjinë “query fan-out”, e cila funksionon duke dërguar disa pyetje në të njëjtën kohë dhe duke përmbledhur të dhënat nga burime të ndryshme për të ndërtuar një përgjigje sa më të saktë dhe të plotë.
 
Aktualisht, kjo veçori është e disponueshme për përdoruesit në SHBA që kanë abonimin Google One AI Premium. Përdoruesit kanë në dispozicion edhe funksione të reja që veprojnë si “agjentë”, të afta të kryejnë detyra të ndryshme si rezervime në restorante apo blerje biletash për evente.
 
Nëse ky modalitet do të vendoset si mënyra e parazgjedhur e kërkimit, kjo pritet të ndikojë ndjeshëm në mënyrën se si njerëzit kërkojnë informacion në internet. Por, gjithashtu mund të ketë pasoja për faqet e internetit që tradicionalisht mbështeten te trafiku nga klikimet në rezultatet e kërkimit. Në fakt, disa botues kanë raportuar tashmë rënie në trafikun e vizitorëve për shkak të përgjigjeve të plota që IA ofron drejtpërdrejt./tvklan.al